Kreu i PD-së, Lulzim Basha, ka reaguar sërish lidhur me miratimin e ndryshimeve kushtetuese në Kuvend.
Përmes disa postimeve në Twitter, Basha thotë se koston e konfliktit të krijuar me prishjen marrëveshjes së 5 Qershorit dhe 14 Janarit do ta mbajë vetëm kryeministri Rama.
Basha shprehet se pas zgjedhjeve të reja vendi i Ramës është në burg, “atje ku shkon çdo individ që me dashje kryen një krim kundër vendit dhe qytetarëve të tij”
Reagimi i plotë:
Koston e konfliktit të krijuar me hedhjen në erë të marrëveshjes së 5 Qershorit dhe 14 Janarit, do ta mbash vetëm ti personalisht Edi Rama. Nëse mendon se me konfliktin e krijuar dhe me prishjen e stabilitetit demokratik të vendit, do të marrësh garanci për kokën tënde dhe të hajdutëve që të rrethojnë, po ta them prerë dhe shkurt: Vendi yt pas zgjedhjeve të reja është në burg, atje ku shkon çdo individ që me dashje kryen një krim kundër vendit dhe qytetarëve të tij.
Partia Demokratike dhe Opozita e Bashkuar do të vazhdojnë të kenë në plan të parë, jo lojën tënde dhe të krimit që të drejton prej 22 vitesh në politikë, por hallet dhe problemet e shqiptarëve, që ti dhe Qeveria jote i kanë braktisur për hallet e tua personale.
