Drejtori i Përgjithshëm i Qendrës Kombëtare të Urgjencës Mjekësore, Dr. Skënder Brataj, ka shprehur shqetësimin për mos respektimin e masave ndaj koronavirusit.
Ai thotë se gjatë ditëve të fundit është trefishuar numri i thirrjeve për ndihmë mjekësore drejt 127, po ashtu numri i vizitave në banesë për të sëmurë me Covid-19.
Doktori thotë se në këtë periudhë është shumë e domosdoshme respektimi i masave, në mënyrë që të parandalohet sëmundja vdekjeprurëse.
Një fluks i shtuar është po kështu edhe nëpër spitale. Edhe një herë tjetër ka kërkuar rregullat e higjienës, distancimin fizik, mbajtjen e maskave në të gjitha ambientet.
Në mesazhin e tij që vjen si shenjë këmbane alarmi, Skënder Brataj ripërsërit faktin se e rëndësishme është që të veprohet tani. Në të kundërt, pasojat do ti vuajmë të gjithë, dhe për një kohë të gjatë.
Statusi
STOP mosrespektimit të masave!!
Masat në këtë moment, nuk po respektohen mjaftueshëm! Është thënë disa herë që do të vlerësohet efikasiteti i tyre herë pas here. Tani po përballemi me efektin e hapjes së shkollave!
Ditët e fundit është trefishuar numri i thirrjeve për ndihmë mjekësore drejt 127, po ashtu numri i vizitave në banesë për të sëmurë me Covid-19.
Është rritur numri i pacientëve drejt spitaleve!
Manifestimet pa maska të ditëve të fundit, takimet zgjedhore pa respektim të distancimit fizik, janë burim i sigurt i shpërndarjes së infeksionit. Rritja në vazhdim e numrit të të infektuarëve në ditët e fundit është rezultat i hapjes së shkollave, mos respektimit të masave të tjera, qëndrimi në lokale pa maska ku nuk ruhet distancimi fizik!
Respektimi i masave është shumë i domosdoshëm në këtë moment të pandemisë! Vetëm institucionet nuk mund t’ja dalin pa ndihmën e qytetarëve, pa bashkëpunimin tuaj!
Kujdes! Virusi nuk njeh kthim mbrapa. Ai dëmton, ai nuk mban radhë, ai nuk njeh moshë, ai merr jetë, ai jeton vetëm në qelizat humane, ai jeton vetëm në trupin tonë. Ndalojeni të hyjë në trupin tuaj, respektoni rregullat e higjienës, ruani distancimin fizik, mbani maskën në të gjitha ambientet!
Ndoshta shumë njerëz nuk e mendojnë si e mendoj unë, ndoshta nuk janë dakort me masat, por detyra ime është të informoj qytetarët, është të shpëtoj jetën e njerëzve!
Ndoshta do më shani sot! Nuk ka rëndësi. Shëndeti juaj është i pari, shëndeti i shqiptarëve është i pari. E rëndësishme është të veprohet tani, sot, menjëherë! Përndryshe pasojat do ti vuajmë të gjithë dhe për një kohë të gjatë!
Ruani veten, ruani familjen, ruani shoqërinë, ruani jetën!
Vetëm së bashku mund t’ja dalim!
Dr. Skender Brataj
