Stadiumi “Loro Boriçi” është epiqendra e të gjithë shqiptarëve sot, që i kanë sytë në përballjen kundër Turqisë, me Kombëtaren e cila luan sfidën e saj të parë zyrtare për vitin 2019.
Në rrugët dhe në lokalet e qytetit të Shkodrës, janë me mijëra tifozë të cilët kryefjalë në këtë ditë kanë ndeshjen Shqipëri-Turqi. Sakaq, pritet që deri në fillimin e takimit, numri i tifozëve të rritet edhe më shumë duke qenë se interesi është rritur ku të shumtë janë edhe tifozët të cilët kanë ardhur nga Kosova për këtë ndeshje të rëndësishme.
Natyrisht, ashtu siç ka ndodhur edhe në ndeshje të tjera më parë, këngët patriotike kumbojnë në qytet ndërkohë që tifozët nuk lënë pas as përgatitjet për këndimin e himnit të Shqipërisë. Pak orë më parë, tifozët ishin mbledhur para hotelit ku qëndron Kombëtarja, por policia i ka larguar duke lënë në qetësi futbollistët para ndeshjes.
