Sekretari i Përgjithshëm i Partisë Demokratike, Gazment Bardhi, tha dje në “Open” se ka qenë një gabim që nuk janë futur në lista të përbashkëta me Lëvizjen Socialiste për Integrim në zgjedhjet e 25 prillit. Ai hodhi dritë mbi tentativat për një marrëveshje para zgjedhore me partinë e Monika Kryemadhit, ku zbuloi se i kanë ofruar 15 mandate të sigurta, por kanë refuzuar, pasi pretendonin se do të fitonin të vetëm deri në 34 karrige në parlamentin e Shqipërisë.
Kryetarja e Lëvizjes Socialiste për Integrim, Monika Kryemadhi, ka reaguar në lidhje me deklaratën e Gazment Bardhit, për 15 mandatet e ofruara nga PD-ja për LSI-në. Me anë të një postimi në Facebook, Kryemadhi i ka ‘kërkuar llogari’ Bardhit në lidhje me këtë deklaratë, duke ngritur pyetje se në cilën ditë dhe orë ka ndodhur kjo ofertë. Ajo gjithashtu shkruan se ky është një mashtrim pervers, që i kalon çdo limiti njerëzor dhe se PD-ja po gënjen njësoj si për djegien e mandateve, për të cilat thanë se i mbështet kancelarja gjermane Merkel.
“Një pyetje për të gjithë anëtarët e kryesisë së PD: Kur është mbledhur kryesia e PD për t’i propozuar LSI listën e përbashkët? Në cilën ditë dhe orë? Listës së mashtrimit, që për djegien e mandateve do t’i dilte në krah kancelarja Merkel dhe PPE, iu shtua tashmë publikisht edhe kjo e 15 mandateve të ofruara. Një mashtrim pervers që kalon çdo limit njerëzor dhe që i shërben vetëm Ramës dhe hijes së tij”.
