Një rrjete sociale janë publikuar disa video, ku shihet teksa shkarkohen mëngjesin e sotëm disa qese me ndihma për të prekurit nga tërmeti i 26 nëntorit.
Ndihmat, kryesisht ushqime, shkarkohen nga një makine në derën e pasme të Ministrisë së Brendshme. Videot janë publikuar nga Aleanca për Mbrojtjen e Teatrit.
Ndërkohë, lidhur me këtë denoncim ka reaguar menjëherë Shërbimi për Çështjet e Brendshme dhe Ankesat. Teksa ka sqaruar si qëndron e vërteta pas videos së publikuar në media.
Në njoftimin e Ministrisë së Brendshme thuhet se pakot ushqimore janë provat e sekuestruara në operacionin e kryer 4 ditë më parë, ku në pranga përfunduan 2 punonjës policie, 1 punonjës i Shërbimit Zjarrfikës, si edhe u proceduan penalisht 2 shtetase.
Reagimi i SHÇBA:
Lidhur me pamjet filmike të publikuara në rrjete sociale e më pas në disa media online, ku shfaqen punonjës të Shërbimit për Çështjet e Brendshme dhe Ankesat (SHÇBA) që shkarkojnë disa pako, sqarojmë se: Pakot me ndihma janë prova materiale të sekuestruara në operacionin e datës 28.11.2019, ku u arrestuan në flagrancë 2 punonjës policie, 1 punonjës i Shërbimit Zjarrfikës, si edhe u proceduan penalisht 2 shtetase për veprat penale të “Mashtrimit” dhe “Shpërdorimit të detyrës”.
Procedimi i shtetasve të mësipërm u krye pas hetimeve të zhvilluara në lidhje me publikimin e një video në media, ku shfaqeshin pamje të transportimit e përvetësimit të një sasie të konsiderueshme pakosh ushqimore (të sekuestruara në cilësinë e provës materiale) të destinuara për banorët e prekur nga situata e tërmetit.
Me urdher te Prokurorise, të gjitha provat materiale të sekuestruara gjatë këtij operacioni janë magazinuar pranë magazinës së Drejtorisë së Përgjithshme të SHÇBA-së, ku është mbajtur proces-verbali përkatës.
Drejtoria e Pergjithshme e SHÇBA, e cila po heton rastin konkret i ka zyrat në godinën e Ministrisë së Brendshme. SHÇBA apelon mediat të kontaktojne per te marre informacion zyrtar per lajme qe lidhen me Sherbimin, per te shmangur dizinformimin e qellimshem te publikut. SHÇBA fton qytetarët dhe mediat te denoncojne çdo rast abuzimi, duke vene ne dispozicion numrin falas 0800 90 90.
