Ish-deputeti i PD-së, Edmond Spaho ka reaguar në lidhje me deklaratat e bëra nga kryeministri Edi Rama në Kuvend, se “vendi ynë s’ka pse të ketë zili asnjë vend në botë”.
Përmes një postimi në Facebook, Spaho shprehet se Shqipëria renditet e fundit jo vetëm në rajon por edhe në botë për ndihmën ekonomike.
Ish-deputeti ka publikuar edhe një raport të FMN, i cili tregon se qeveria shqiptare ka angazhuar vetëm 1,3% të GDP për ekonominë dhe grupet sociale.
“Dhe kjo është akoma në letër, sepse vetëm 5 mln euro janë shpërndarë për biznesin e vogël dhe fondi i garancisë është joefektiv! Edi Rama, njerëzit po vuajnë, lëri gënjeshtrat dhe propagandën”, shkruan ai në postimin e tij.
Kreu i qeverisë tha se Shqipëria ka bërë aq sa ka bërë çdo vend tjetër, për të përballur pandeminë. Gjatë fjalës së tij në Kuvend, ku kërkoi votat për të miratuar ndryshimet në Kodin Penal, Rama tha se Shqipëria do e fitojë luftën me COVID-19 në të dyja frontet, ekonomike dhe shëndetësore.
Postimi i plotë:
Shqipëria në mënyrë absolute është e fundit jo vetëm në rajon, por dhe në botë! Sot sipas FMN qeveria shqiptare ka anagazhuar 1,3% të GDP për ekonominë dhe grupet sociale. Dhe kjo është akoma në letër, sepse vetëm 5 mln euro janë shpërndarë për biznesin e vogël dhe fondi i garancisë është joefektiv! Edi Rama, njerëzit po vuajnë, lëri gënjeshtrat dhe propagandën!
Anullo koncesionet, ndrysho buxhetin, vendos çdo burim në funksion të mbështetjes për njerëzit dhe ringritjes së ekonomisë! Nuk ka pushtet e përfitim personal që vlen më shumë se jeta dhe mirëqenia e shqiptarëve.
