Një ndërtim pa leje është bërë mollë sherri mes dy qytetarëve në Shkodër dhe për pasoje ka plasur edhe dhuna mes tyre.
Sipas të dhënave të policisë, një qytetar dhe gruaja e tij janë rrahur nga një 59-vjeçar pasi po ndërtonin pa leje.
Qytetari dhunues para një muaji i ka kallëzuar në polici për këtë ndërtim, ndërkohë që nuk është mjaftuar me kaq por dje ka shkuar dhe i ka goditur.
Burimet e policisë bëjnë me dije se i lënduari dhe një grua, kanë ndërtuar pa leje dhe janë denoncuar në organet e Policisë nga shtetasi P. Th. Ky i fundit, nuk është ndalur me kaq dhe dje ka bërë për spital shtetasin A. B.
Njoftimi i policisë:
Specialistët për hetimin e krimeve në Komisariatin e Policisë Shkodër arrestuan në flagrancë shtetasin P. Th., 59 vjeç, banues në Laç, për veprën penale “Plagosja e rëndë me dashje”, si dhe ndaluan shtetasin e shpallur në kërkim policor A. B., 30 vjeç, banues në Theth, Shkodër, për veprat penale “Vetëgjyqësia” “Kanosja” dhe “Ndërtim i paligjshëm”.
Këta shtetas, në muajin dhjetor 2019 janë proceduar penalisht, pasi shtetasi A. B., bashkë me shtetasen K. B. (e proceduar në gjendje të lirë për veprën penale “Ndërtim i paligjshëm”) kanë ndërtuar pa leje dhe janë denoncuar në organet e Policisë nga shtetasi P. Th. Për këtë rast janë kryer veprimet hetimore dhe janë referuar materialet në Prokurorinë e Rrethit Gjyqësor Shkodër.
Ditën e djeshme, shtetasi A. B. është konfliktuar fizikisht me shtetasin P. Th., për pasojë shtetasi A. B. ndodhet në Spitalin Rajonal Shkodër, për ndihmë mjekësore.
Materialet procedurale iu referuan Prokurorisë pranë Gjykatës së Shkallës së Parë Shkodër.
Denonco ne TT