Kosova ka regjistruar sot një tjetër viktimë nga koronavirusi, duke e çuar në 32 numrin total të personave që kanë humbur jetën nga kjo sëmundje.
Bëhet fjalë për një 71-vjeçar nga komuna e Prizrenit, i cili ishte pranuar në Klinikën Infektive me datën 5 të këtij muaji. Sipas mediave vendase, i moshuari vuante edhe nga sëmundje të tjera shoqëruese.
“Sot, në repartin e Mjekimit Intensiv në Klinikën Infektive ka ndërruar jetë pacienti 71 vjeçar nga komuna e Prizrenit, i pranuar me 05.06.2020, i cili përveç infeksionit me COVID -19, kishte edhe sëmundje tjera shoqëruese”, thuhet në njoftimin e Shërbimit Spitalor Klinik Universitar të Kosovës.
Aktualisht në Klinikën Infektive janë duke u trajtuar 32 të prekur me COVID-19.
Sipas njoftimit, 18 pacientë të shtrirë në këtë klinikë me COVID-19 janë me gjendje stabile. 12 raste janë duke u trajtuar në repart me oksigjenoterapi dhe përkujdesje intensive.
Deri më sot në Kosovë janë regjistruar 1,384 raste me koronavirus. Prej tyre 921 persona janë shëruar ndërsa 431 raste janë ende aktive.
