Së fundmi ka ndërruar jetë një pacient tek Spitali Infektiv.
Bëhet fjalë për një 69 vjeçar nga Shkodra i cili ishte shtruar disa ditë më parë për shkak të koronavirusit.
Raportohet se pacienti që ndërroi jetë kishte sëmundje të tjera shoqëruese.
69-vjeçari ishte infektuar në spitalin e Shkodrës nga infermierja dhe u soll në Tiranë bashkë me disa pacientë të tjerë që ishin prekur gjithashtu nga COVID-19.
Mbetet të presim reagimin e spitalit nëse do ta kategorizojë si viktimë e koronavirusit apo jo.
Kujtojmë se gjatë 24 orëve të fundit, 19 pacientë të tjerë i janë shtuar listës së të shëruarve nga COVID-19 në Shqipëri duke e çuar numrin total në 302.
Ministria e Shëndetësisë sqaroi pak më herët se aktualisht në vendin tonë janë 220 persona të infektuar aktivë dhe numri i të shëruarve është më i lartë, tendencë kjo që tashmë vazhdon pa luhatje që prej 7 ditësh.
Nga ana tjetër, 9 raste të reja me koronavirus u konfirmuan në 24 orët e fundit, duke e çuar numrin total të të prekurve në 548.
