Ka ndërruar jetë në moshën 82-vjeçare e ëma e kryeministrit Edi Rama, Aneta Rama. Lajmi është dhënë në rrjetet sociale nga kryeministri, i cili shprehet se e ëma ka qenë për të drita e shtëpisë.
“Ishe drita dhe guri këndor i shtëpisë ku u rritëm e u bëmë burra, e ku mbetëm gjithnjë fëmijë.
E di, që deri sa të shoh dot diellin e yjet do të jesh me mua, e bukur dhe e fortë si askush. Do të na mungosh shumë, por asgjë më shumë nuk bëje dot për ne sesa e pamundura që bëre plot përkushtim gjithë jetën, prandaj prehu në paqe mam”, shkruan Rama.
E ëma e kreut të qeverisë vuante nga një sëmundje e rëndë, dhe nuk mundi të fitonte betejën. Ajo kreu edhe disa operacione, por nuk mundi të shpëtonte.
Daljet e saj në publik kanë qenë të rralla vitet e fundit, dhe imazhet e Anetës janë sjellë nga vetë kryeministri nëpërmjet postimeve në rrjetet sociale.
Më 4 korrik, në ditën e tij të lindjes, kryeministri Rama postoi edhe foton e fundit të nënës së tij. Në foto ai shfaqej i përqafuar me zonjën Aneta, dhe shkruante: “Me gruan që më dha jetën”.
