Presidenti Meta është pyetur sot gjatë konferencës për shtyp, lidhur me ndërmjetësimin e kryepeshkopit Janullatos, siç njoftoi ministri për Diasporën, Majko, për radhët kilometrike në Kakavijë.
Presidenti u shpreh se gjithçka ndodhi për faj të qeverisë shqiptare, dhe jo për faj të shtetit fqinj. Kreu i Shtetit Meta tha se është e pakuptimtë për të fajësuar palën greke, pasi ata e kanë bërë detyrën në mënyrë të jashtëzakonshme. Ai e ka ngarkuar me përgjegjësinë më të rëndë, kryeministrin Edi Rama në veçanti, për situatën e rëndë humanitare që u shkaktua në kufirin me Greqinë, jo vetëm në Kakavijë, por edhe në Kapshticë. Meta tha se Rama ka përgjegjësi të dyfishtë, pasi është jo vetëm kryeministër, por edhe Ministër i Jashtëm i Shqipërisë.
“Çdo përpjekje për të fajësuar palën greke është pa kuptim, sepse e dimë shumë mirë që qeveria greke e pala greke, edhe për të drejtat e një shtetasi shqiptar me kombësi greke e bën detyrën e vet në mënyrë të jashtëzakonshme.
Kjo është përgjegjësi e plotë e shtetit shqiptar, përfshirë edhe presidentin, e në mënyrë të veçantë edhe qeverisë, kur kryeministri ka përgjegjësi të shumfishtë, se ka përgjegjësi për gjithë qeverinë, edhe si Ministër i Jashtëm ende në detyrë”, deklaroi Meta.
