Koordinatori i Bindjes Demokratike, Astrit Patozi, ka komentuar vendimin e Gjykatave për të mos legjitimuar emrin e Valbona Sakos si kryebashkiake të Durrësit. Ai ka hedhur akuza të forta mbi Lulzim Bashën, ku shprehet se kryedemokrati po shtyn ditët e tij, derisa të dalë një gjë tjetër, e njerëzit të harrojnë faktin që i fali kundërshtarit 61 bashkitë pa betejë. Po kështu, Patozi me ironi thotë se ka me dhjetëra vendime të tjera gjykatash, të cilat Basha nuk i pranon, pasi nuk i interesojnë.
Sot Gjykata e Durrësit nuk i dha mandatin e kryebashkiakes Valbona Sakos, e cila u shpall fituese me PS-në në votimet e 30 qershorit. Gjykata ka renditur tre arsye përse nuk e pranon Sakon si kryebashkiaken e re të Durrësit. Në vendim konsiderohen të pavlefshme: 1-Regjistrimi i Bindjes Demokratike për zgjedhjet e 30 qershorit; 2-Përmbajtja e fletës së votimit për kandidatët për kryetarë Bashkie; 3- Vendimi i KQZ-së për rezultatet e votimit në Durrës.
Më 30 qershor, Bindja Demokratike kandidoi në Durrës me Valbona Sakollarin. Por sipas vendimit të Gjykatës, kjo parti është regjistruar jashtë afatit zyrtar, dhe për këtë arsye zgjedhjet lokale janë nul.
Statusi
NDAJE MENDJEN, O JURIST!
Eh, mor jurist, që nuk e tregon diplomën, megjithëse ta kanë bërë çështje prej shumë kohësh shkollimin tënd në Holandë! Qenke gëzuar për një vendim gjykate në Durrës, ndërkohë që po të kishe formimim elementar për atë, që pretendon se je arsimuar, duhet t’i njohësh të gjitha vendimet e institucioneve, jo vetëm ato që të pëlqejnë ty.
Ka një anekdotë me qershitë, për dikë që i ndante në të bëra pis ose jo. Dhe në fund i hëngri të gjitha, ngaqë i dukeshin të pastra edhe ato që kishin ngelur të fundit.
Sepse ka dhjetëra vendime të tjera gjykatash të cilat ti nuk i pranon, se nuk të interesojnë.
Por unë ta njoh hallin dhe nuk të vë shumë faj. Ti thjesht po shtyn ditët e tua, derisa të dalë një gjë tjetër e të harrohet fakti që i fale kundërshtarit 61 bashkitë pa betejë, kur u the njerëzve që zgjedhje vendore pa ty në Shqipëri nuk do të ketë.
E nise këtë punë me gënjeshtrën që BINDJA DEMOKRATIKE mori pjesë në procesin e 30 qershorit për të legjitimuar fitoren e Edi Ramës. Tani e paske ndërruar pllakën e gramafonit dhe po thua që ne ishim në këto zgjedhje për të deligjitimuar procesin.
Ka një shprehje të Shqipërisë së Mesme, që të shkon shumë në këtë rast: “O fol e mba, o dh.. e ha”.
Kaq për sot…Sepse unë nuk kam ndërmend të komentoj një vendim gjykate, sado i çmendur apo i porositur nga ndonjë kamikaz i dëshpëruar si ty që të më duket.
