Gazetarja Klodiana Lala ka bërë një deklaratë të fortë në lidhje me dënimin e ish-ministrit të Brendshëm, Saimir Tahiri. E ftuar në rubrikën “Opinion” në “News24” Lala tha se nëse Tahiri do të flasë, do të fundosë shumë emra të tjerë politikanësh të rëndësishëm. Sipas gazetares, lajmi i arrestimit të tij ka lënë pa gjumë shumë politikanë dhe shumë personazhe të tjerë. Sipas saj, mbetet për t’u parë nëse ai do të tregojë apo jo për kohën kur ai ishte ministër kampion.
“Dosja Tahiri nuk është çështje SPAK, por dosje e vjetër. Tahiri ka një hetim për “shpërdorim detyre”. Tahiri nuk duhet të ketë i vetëm në qeli, pasi ku është drejtori i policisë? Ku janë ministrat e tjerë të linjës? A ka pasur dijeni kryeministri i vendit për kanabizimin? Nëse Tahiri ka lejuar përhapjen e kanabizimit, ne kemi qenë dëshmitar që ka pasur masivizim të kësaj situate, por a ishte përgjegjës Tahiri?
Drejtësia është e vonuar në këtë drejtim. A kemi ministra të tjerë që kanë shpërdoruar? Patjetër! Beqja, apo dhe ish-ministri Koka. Unë mendoj se Saimir Tahiri duhet të flasë dhe të tregojë për përgjegjësit, që të shkojnë pas hekurave. E tha dhe z. Haxhiaj, se disa politikanë duhet të vishen trashë në dimër. Ndaj edhe Tahiri mund të flasë. Z. Haxhiaj e la të nënkuptohej se Tahiri edhe mund të flasë. Nëse Tahiri flet, unë mendoj se lajmi i djeshëm i arrestimit të tij ka lënë pa gjumë shumë politikanë dhe shumë personazhe të tjerë. Saimir Tahiri nuk flet për një çantë të zezë hipotetike, por fundos shumë veta. Mbetet për t’u parë nëse ai do të tregojë apo jo për kohën kur ai ishte ministër kampion”, tha Lala.
