Kryetari i Lidhjes Demokratike të Kosovës Isa Mustafa gjatë takimit me Presidentin Hashim Thaçi deklaroi se Lidhja Demokratike e Kosovës është kundër zgjedhjeve të reja dhe pro krijimit të Qeverisë së re.
Mustafa theksoi se partia e tij është e gatshme që të marrë përgjegjësitë për krijimin e shumicës në Kuvendin e Republikës së Kosovës nëse i ofrohet një mundësi e tillë.
“Unë dhe në emër të LDK-së vlerësojmë që në këto momente nuk duhet të shkojmë në zgjedhje dhe se duhet të bëjmë përpjekje që të themelojmë një qeveri që ka mandate nga Kuvendi dhe që mund të qeverisë vendin në mënyrë normale.
Ne besojmë se Qeveria në detyrë nuk i përgjigjet kërkesave në tërësi që shtrohen para saj, sepse Kuvendi ka shprehur mosbesim ndaj kësaj qeverie me 82 vota me mocion mosbesimi.Vendit i nevojitet një qeveri që mund të punojë në kapacitetet të plota.
Momenti i tanishëm që po ballafaqohet Kosova nuk mundëson që ne të organizojmë zgjedhje normale dhe të rregullta dhe kjo është një faktor shtesë që ne të bëjmë përpjekje të bëjmë një qeveri që siguron një shumicën në Kuvendin e Kosovës dhe këtë ta bëjmë sa më shpejt.
Si LDK jemi të gatshëm që të ndërrmarim iniciativën që të sigurojmë shumicën, nëse na ofrohet kjo përgjegjësi dhe mendoj që këtë duhet të bëjmë bashkarisht”, u shpreh Mustafa.
