Kreu i grupit Parlamentar Demokrat, Myslim Murrizi, është shprehur se do të mirëpresë çdo propozim për sa kohë ajo kërkon hapjen e listave.
Në një prononcim për mediat pas bojkotit të mbledhjes së Komisionit të Ligjeve, Murrizi tha se shpreson se mbledhja e ditës së nesërme mos të shtyhet “për shkak se përkon me festën kombëtare të Kinës”.
“Kërkojmë atë që kemi kërkuar prej 19 muajsh në Kuvend. Është hera e parë që të mëdhenjtë në Kuvend erdhën te propozimet e opozitës parlamentare. Pas kërkesës sonë maxhoranca pranoi të tërhiqej nga mbledhja e sotme për diskutuar propozimin tonë në emër të 11 deputetëve.
Edhe draft i Bashkimit Sovjetik nëse kërkon hapjen e listave duhet të merret dhe të shikohet. Jo më i PD. Ne kemi pasur një kërkesë vetëm për hapjen e listave që qytetarët të dinë se kë do votojnë. Opozita jashtë parlamentare e ka deputetin që i sjell draftin në Kuvend. Tashmë opozita ka zgjedhur Gjiknurin. Ai sjell draftet që mblidhen më pas në Këshillin Politik. Shpresoj të mblidhen dhe të mos e anulojnë për shkak se nesër është festa Kombëtare e Kinës. ne e kemi draftin tonë dhe mirëpresim propozim nga cilido subjekt politik”, tha ai.
