Kryeministri Rama ka folur troç se si mund të shkojë situata nëse qytetarët nuk qëndrojnë në shtëpi. Në një intervistë ‘live’ në News24, ai paralajmëroi se nëse do ketë shkelje nga ana e qytetarëve, atëherë do të përfundojmë si Italia fqinje, ku numri i të vdekurve po shënon shifra rekord.
“Mund të përfundojmë edhe si Italia”. Kështu u shpreh kryeministri Rama, duke treguar se mund të ishte skenari më i keq, nga përhapja e kësaj pandemie. Gjithsesi ai qetësoi qytetarët se qeveria i ka marrë të gjitha masat, nga të cilat po shpëtohen jetë njerëzish.
Po kështu, Rama tha se askush nuk është i paprekshëm, por masat janë marrë që ne mos ti ngjajmë aspak Italisë.
“Skenari më i keq me koronavirusin është ai i italisë. I kemi marrë të gjitha masat, të bindur se me ç’ka po bëjmë çdo ditë, po lehtësojmë plagë e po shpëtojmë jetë, po e ngadalësojmë përhapjen e virusit. Por nga ana tjetër, askush në botë nuk e di se deri në çfarë pike mund të na cënojë virusi. Ti lutemi Zotit të mos jemi para më te keqes fare, se para saj gjunjëzohet edhe SHBA”, tha ai.
