Ministria e Shëndetësisë së Kosovës ka paralajmëruar qytetarët që të përgatiten, pasi muaji korrik do të jetë mjaft i vështirë.
Për shkak të numrit të madh të rasteve, në Prishtinë, Ferizaj, Prizren dhe Vushtrri nga sot do të ketë kufizim të lëvizjes.
Drejtori i zyrës për media në Ministrinë e Shëndetësisë, Faik Hoti, deklaroi se shtimi i rasteve me koronavirus ka ardhur si pasojë e mosrespektimit të masave.
“I bëjë thirrje qytetarëve të heqin dorë nga disa aktivitete që po ndikojnë në mbjelljen e virusit. Disa aktivitete të ndryshme që kanë ndodhur ilegale, dasmat e ahengje e deri te trendi i lëvizjes në bregdete gjatë vikendit kanë bërë që të kemi situatën e ngarkuar. Shifrat tregojnë se si jemi sjell ne si shoqëri”, tha ai.
Nga ana tjetër, kryeministri Hoti tha se qeveria kishte synim lirimin e masave, por që disa biznese e kanë keqpërdor mirëbesimin e shtetit dhe nuk kanë respektuar masat.
“Qeveria ka kërkuar nga ISHKP që me automatizëm që secila komunë që ka rritje të numrit do të përjetoj fatin që të futet në kufizimin e lëvizjes. Në bazë të asaj që ka rrjedhë, në këtë muaj duhet të bëhemi gati që të jetë muaj i vështirë, por duhet të bëhemi gati që në muajin tjetër të jemi më mirë”, tha ai për RTV Dukagjinin.
Më shumë se 1,500 raste me koronavirus janë ende aktive në Kosovë.
