Deputeti Adriatik Alimadhi ka arritur të shërohet plotësisht nga koronavirusi.
Testi i tij i fundit ka rezultuar negativ, rreth një muaj pasi u shtrua në Spitalin Infektiv.
Mirëpo, megjithëse tashmë e ka mposhtur Covid-19, Alimadhi vazhdon të ketë probleme serioze me mushkëritë.
Këtë lajm e ka konfirmuar Shefja e Shërbimit të Pneumologjisë, Silva Bala, në një lidhje me “Report TV”.
Bala tregon se mushkëritë e tij të dëmtuara kanë nevojë të vazhdueshme për oksigjen.
“Dje kam pritur edhe deputetin Alimadhi. Ai është shëruar nga covid, por problemet e mushkërive mbeten serioze si pasojë e komplikacionit nga Covid-19. Alimadhi është në trajtim me oksigjen me presione të larta dhe ka nevojë të vazhdueshme që mushkëria e tij të trajtohet me oksigjen, por nuk është i intubuar.
Pacientët janë kryesisht mbi moshën 60 vjeç, në 2/3 e tyre kanë sëmundje shoqëruese si diabet apo hipertension dhe kanë një ndjekje në vazhdimësi jo vetëm nga pneumologu, por dhe kardiologu etj. Pra trajtimi i tyre është kompleks.
Situata në spitalin tonë në Shërbimin e Penumonisë është e qetë. Aktualisht trajtohen mbi 10 pacientë me pneumoni aspekt covid, por me testim covid negativ.
Këto konsiderohen si të sëmurë të cilët janë kontingjent që ka dhënë ky virus në mushkëritë e tyre. Ndërsa në reanimacion janë 3 të intubuar në gjendje të rëndë”, ka rrëfyer ajo.
