Vijon përplasja Gjonaj-Kryemadhi, teksa kjo e fundit sulmoi sërish sot ministren e Drejtësisë, duke e sugjeruar “të mos marrë pozicionin e virgjëreshës”.
Këtë deklaratë, Kryemadhi e bëri pas takimit me ambasadorët e BE-së, teksa tha se nuk ka asnjë shantazh ndaj Gjonajt, por ajo “nuk duhet të marrë pozicionin e virgjëreshës”, pasi sipas saj, dihet shumë mirë se si është e kapur, ministrja e Drejtësisë e ka quajtur këtë një sulm vulgar, me qëllimin e vetëm ndaljen dhe intimidimin e drejtësisë.
Menjëherë ka reaguar Ministrja e Drejtësisë, e cila i dërgoi mesazhin e drejtpërdrejtë Kryemadhit, duke i thënë se sulmet e saj nuk e ndalin dot.
“Jam sulmuar familjarisht pas arrestimit të një grupi personash që dyshohet se janë përgjegjës për një sërë abuzimesh dhe shkeljesh ligjore me tenderat në MD. Kjo ka bërë që zonja Kryemadhi të lëshohet me shantazhime kundër meje dhe familjes sime, por unë nuk jam këtu për t’i kthyer përgjigje Kryemadhit për sulmin e ulët, por të them se mua nuk më ndalin dot të bëj me përkushtim profesionalizëm dhe integritet vetëm detyrën time.
Unë mbështes prokurorinë në luftën kundër korrupsionit dhe të thellojë hetimin për të vënë para përgjegjësisë këdo që ka hedhur firmën në ato tenderë. Sulmi vulgar ndaj meje nuk ishte rrufe në qiell të pastër dhe as nevojë e luftës politike me doza papërgjegjshmëri mbi ato që thuhen, unë u sulmova me qëllimin e vetë për të sulmuar drejtësinë. Në përgjigje të këtij sulmi që nuk do ndalen, i bëj thirrje drejtësisë të mos ndalet për të vënë para përgjegjësisë këto që ka abuzuar dhe prokurorisë të mos intimidohet nga kërcënimet dhe sulmet e kujtdo”– deklaroi Gjonaj.
