Kryeministri Edi Rama deklaroi se Bashkimi Europian dështoi të mbante premtimin, për hapjen e negociatave për Shqipërinë dhe Maqedoninë e Veriut. Gjatë fjalës së tij në Shkup, pas takimit me homologun maqedonas Zoran Zaev, Rama u shpreh se reformat e ndërmarra do të vazhdojnë, jo sepse e kërkon BE, por për zhvillimin e brendshëm të vendit.
Ndër të tjera, Rama tha se Bashkëpunimi rajonal do të vazhdojë me të gjitha forcat sepse është i rrethuar nga kufijtë e BE.
Edi Rama: ”BE mund të caktojë detyra për integrimin, afate, data por BE nuk cakton dot as vendndodhjen në mes të Europës, as kulturën dhe identitetin europian. Shqipëria e ka bërë zgjedhjen e saj që në kohën e Gjergj Kastriotit dhe e ka konfirmuar në kohën e Rilindjes. Për mua në këtë pikë, kemi një dallim me Zoranin, sepse për mua nuk ka ndodhur asgjë veçse BE ka dështuar të mbajë premtimin dhe të jetë në qëndrimin e duhur. Jeta vazhdon dhe progresi do të vazhdojë me të gjitha forcat sepse nuk është i imponuar nga jashtë por nga brenda nesh. Bashkëpunimi rajonal do të vazhdojë me të gjitha forcat sepse është i rrethuar nga kufijtë e BE. Jemi shumë të vegjël për të pasur ekonomi të forta për të qëndruar të ndarë nga njëri-tjëtri.”
Në takimin e fundit të Këshillit për Çështje të Përgjithshme të BE-së në Luksemburg, presidenca portugeze ka konstatuar se nuk ekziston konsensus i nevojshëm për të miratuar kornizat negociuese për këto Shqipërinë dhe Maqedoninë e Veriut, si kusht për të hapur negociatat.
