Koronavirusi në Kinë ka shkaktuar vdekjen e 1100 personave, ndërsa raportohet se në shkallë globale janë të infektuar mbi 45 mijë njerëz. Ky virus u përhap fillimisht në Whan, në Kinë, por me lëvizjen e njerëzve të infektuar, virusi është përhapur në 25 vende të botës. OBSH ka ndryshuar emrin e këtij virusi vdekjeprurës, nga koronavirus në Covid-19.
Autoritetet në Nju Jork kanë vendosur një robot në sheshin “Times Square”, për të informuar publikun lidhur me simptomat dhe për mënyrën e parandalimit të përhapjes së virusit vdekjeprurës.
Kalimtarët kureshtarë ndalojnë dhe plotësojnë një pyetësor në një tablet, dhe madje bashkëbisedojnë me robotin. “Kjo është diçka shumë e zgjuar”, thotë një turiste nga Londra. “Prombot” është krijuar nga një kompani në Filadelfia, që drejtohet nga grup shtetasish rusë.
Ata theksojnë se kanë zhvilluar një program special, që mundëson evidentimin e simptomave të koronavirusit të rrezikshëm.
Nga ana tjetër, Organizata Botërore e Shëndetit shpreson ta ketë gati vaksinën për koronavirusin e ri brenda 18 muajve, por deri atëherë, vendet do të duhet të bëjnë të pamundurën për të shmangur sa më shumë virusin.
“Zhvillimi i vaksinave dhe terapive është një pjesë e rëndësishme e axhendës së hulumtimit. Por nuk është vetëm një pjesë. Ata do të kërkojnë kohë për t’u zhvilluar, por ndërkohë, ne nuk jemi të pambrojtur”, tha shefi i OBSH-së Tedros Adhanom Ghebreyesus, gjatë një konference për shtyp të martën.
