Presidenti Ilir Meta ka zhvilluar ditën e sotme një takim me Këshillin Ndërfetar të Shqipërisë.
Ata diskutuan mbi situatën pas tërmetit të 26 nëntorit dhe pasojat materiale e shpirtërore të qytetarëve në zonat e prekura nga kjo fatkeqësi natyrore.
“Roli juaj për rimëkëmbjen shpirtërore, rikthimin e shpresës, forcimin e solidaritetit e kurajës në kapërcimin e momenteve më të vështira që ka kaluar dhe kalon populli ynë është shumë i vyer”, tha Meta.
Ndërkohë kryetarët e bashkësive thanë se kjo krizë duhet të shërbejë si një moment reflektimi dhe pajtimi mes njerëzve.
“Situata tragjike dhe kjo krizë e rëndë humanitare për të gjithë shoqërinë tonë duhet të shërbejë si një moment jo vetëm reflektimi por edhe pajtimi për të qëndruar së bashku në ndërtimin e një të ardhme me paqe, shpresë e dashuri, si një fillim i ri që vendi të ringrihet, jo vetëm materialisht, por edhe shpirtërisht dhe psikologjikisht”, thanë ata.
Presidenti Meta kërkoi që të verifikohen dhe të evidentohen të gjitha objektet e kultit të dëmtuara nga tërmeti. Në mënyrë të tillë që në një kohë sa më të shpejtë të mundësohet rikthimi i tyre në shërbim të qytetarëve dhe të shoqërisë.
