Dominimit spanjoll në futboll duket se po i vjen fundi dhe këtë e konfirmojnë largimet e bujshme që po ndodhin. Fillimisht ishte PSG, më pas Manchester City, Juventus dhe Interi së fundmi që kërkojnë të rrëmbejnë yjet e La Ligas. Largimi i Ronaldos drejt bardhezinjve dhe interesi i lartë i zikaltërve për Modric duket se ka ‘tërbuar’ presidentin e La Liga-s, Javier Tebas.
“Shumë yje po largohen nga La Liga dhe pyetja që ngrenë të gjithë, është “pse po ndodh kjo?”. Ekzistojnë disa klube-shtet, që janë duke shkaktuar inflacion në merkato, duke blerë lojtarë për shuma marramendëse. Në disa skuadra ndodhin gjëra që nuk duhet të ndodhnin dhe këtu i referohem shifrës së shpenzuar nga PSG për Neymar dhe asaj të shpenzuar nga Juventusi për Ronaldon.
Gjithashtu më habiti edhe Interi, që nuk ka para, por që ishte gati të joshte Modricin me paga që nuk dihet se nga do vinin. PSG dhe Manchester City, por ndoshta edhe Interi, janë klube që funksionojnë me mashtrime dhe tifozët e La Ligës duhet ta dinë këtë”, deklaroi Tebas.
