Kompania farmaceutike dhe bioteknologjike Moderna, thotë se vaksina e saj funksionon edhe ndaj varianteve të reja të koronavirusit të shfaqura në Britaninë e Madhe dhe Afrikën e Jugut.
Njoftimi i kompanisë, vjen në një kohë shqetësimi në lidhje me efektivitetin e vaksinave ndaj mutacioneve të reja, shkruan BBC.
Variantet e reja janë përhapur shpejt në shumë shtete në të gjithë botën. Ata kanë pësuar ndryshime ose mutacione që do të thotë se mund të infektojnë qelizat njerëzore më lehtë sesa versioni origjinal i koronavirusit që filloi pandeminë.
Ekspertët mendojnë se varianti i cili u shfaq në shtator ë Britaninë e Madhe, mund të jetë deri në 70% më i transmetueshëm.
Moderna vëren se vaksina mund të funksionojë, por prodhon më pak antitrupa ndaj mutacionit që gjendet në Afrikën e Jugut. Prandaj, kompania po punon për forcimin e vaksinës dhe për të bërë rregullimet e nevojshme.
Deri më tani, rezultatet nuk janë publikuar ose vlerësuar nga shkencëtarët, por janë dorëzuar në bioRxiv, i cili publikon studime paraprake në internet.