Sipas raportueses për Kosovën në Parlamentin Evropian Viola von Cramon, vendimi i LDK-së për të nisur mocion mosbesimi ndaj Qeverisë Kurti, mund të jetë katastrofik për Kosovën dhe rajonin.
Në një postim në rrjetin social Twitter, ajo shkruan: “Nëse LDK-ja paraqet mocion mosbesimi ndaj Qeverisë, pjesë e së cilës është edhe vetë, atëherë kjo do të nënkuptonte një katastrofë jo vetëm për Kosovën, por edhe për tërë rajonin”.
Përmes një tjetër postimi, Cramon ka kërkuar nga kryeministri Albin Kurti dhe kryeparlamentarja Vjosa Osmani që të shmangin mbajtjen e zgjedhjeve të reja:
“Çfarë po ndodh në Kosovë, Albin Kurti dhe Vjosa Osmani? Ju lutemi parandaloni edhe një raund tjetër të zgjedhjeve të parakohshme për vendin tuaj”.
Kujtojmë se ditën e djeshme Lidhja Demokratike e Kosovës ka paralajmëruar mocionin e mosbesimit për Qeverinë Kurti.
Vendimi është marrë në mbledhjen e Kryesisë së LDK-së, e thirrur pas shkarkimit të Agim Veliut nga posti i ministrit të Punëve të Brendshme.
