Mjeku infeksionist Tritan Kalo, ka reaguar me anë të një postimi në Facebook pas lajmit se pacienti i parë në Shqipëri është drejt shërimit nga COVID-19. Kalo shkruan se fillimi i mirë është gjysma e punës, dhe u uron suksese të mëtejshme të gjithë mjekëve që po ndihmojnë pacientët në këto kohë. Mjeku shton më tej se puna, profesionalizmi dhe përkushtimi i ekipit, do ta mundin këtë sëmundje të rrezikshme.
Burime nga Spitali Infektiv i QSUT-së thonë se kanë rezultuar negative analizat për personin që u infektua nga 28-vjeçari i konsideruar si “pacienti zero” nga Tirana. Ai ka qëndruar një javë në spital, dhe do të bëhet brenda 48 orëve një tjetër analizë për të verifikuar gjendjen e tij.
Statusi
“FILLIMI I MBARË shënon edhe gjysmën e punës….Negativizimi dhe pragshërimi i plotë i të sëmurit të parë me Covid-19, shënon një SUKSES të merituar të ekipit të Shërbimit të Sëmundjeve Infektive….SUKSESE edhe të mëtutjeme të gjithë Mantelbardhëve, Infermjerëve, Imazheristëve, Farmacistëve, Sanitarëve, Barelistëve, Koordinatoreve dhe Administratoreve të Shërbimit të Sëmundjeve Infektive në QSUT “Nënë Tereza”…..Jemi për momentin “remi” në ndeshjen e gjatë të shahut me supertinzarin Covid-19…PUNA, PROFESIONALIZMI dhe PËRKUSHTIMI i ekipit tone, jam mëse i sigurtë se në një kohë jo të largët, do ta “zërë shah-mat” këtë sëmundje mjaft të rrezikshme por jo të pamposhtëme…. Durimi, Guximi dhe Këmbëngulja e të gjithëve NE, por edhe e të gjithë kolegëve në QSUT si dhe në ngrehinat e tjera të Shëndetit Publik të paracaktuara për ndjekjen e të sëmurëve me Covid-19, do të na nxjerë PATJETËR faqebardhë në këtë betejë për triumfin e JETËS!!
Të martën, numri i të infektuarve me koronavirus në vendin tonë shkoi në 55. Mes 4 rasteve të reja të identifikuara, 2 janë staf mjekësor i spitalit “Shefqet Ndroqi”, të cilët u infektuan pasi një person i sapo kthyer nga Italia shkoi për vizitë tek një pacient, duke infektuar të afërmin e tij dhe stafin e spitalit.
