Mjeku Arjan Mezini ka dhënë shpresa se situata është drejt përmirësimit, referuar shifrave aktuale të infektimeve. Duke bërë një bilanc e duke folur përmes shifrave, mjeku tha se rastet që shtrohen nuk i kalojmë 5-7 maksimumi në një ditë të caktuar deri në 10. Kurse para një muaji shkonte deri në 40.
I ftuar në “Abc-ja e mëngjesit”, ai u shpreh se situata në spitale është më e lehtësuar, dhe se pritet një rritje e rasteve në gjysmën e dytë të janarit, por jo në ato shifra që u raportuan në dy mujorin nëntor-dhjetor.
“Do të ketë një shtim të rasteve, por jo në ato shifra që pamë në nëntor apo fillim dhjetori. Vërejmë dhe nëpër spitale, shtrimet janë ulur ndjeshëm. Rastet që shtrohen nuk i kalojmë 5-7 maksimumi në një ditë të caktuar deri në 10. Kurse para një muaji shkonte deri në 40. Kjo më bën të mendoj se dy javëshi i fundit i janarit do të shënojë një rritje, por jo në ato shifra siç ishin në nëntor”, u shpreh Mezini.
Duke iu referuar studimit të akademikut Genc Sulçebe dhe profesor Alban Ylli, ku thuhej se rreth 50 për qind e popullsisë në Tiranë e kanë kaluar koronavirusin, mjeku u shpreh optimist se dhe me nisjen e vaksinimit, vera e ardhshme do të jetë më e qetë. “I besoj studimit të profesor Genc Sulçebe dhe Alban Yllit sesa i saktë është, por shifrat aty sorollaten tek 40-50 për qind. Gjysma e njerëzve e kanë kaluar Covidin dhe ne kemi krijuar një përqindje të asaj që quhet imuniteti kolektiv. Nëse do të kemi dhe vaksinën, besoj na duhen dhe 2 milionë doza të tjera, kam përshtypjen se do të kemi një verë shumë më të qetë”, përfundoi ai.
