Pacientët e shëruar nga Covid-19 mund të jenë imunë nga gjashtë muaj deri në një vit. Kështu u shpreh mjeku Arjet Gega, në një intervistë me skype nga SHBA për ‘Ora News’. Sipas tij, për këtë afat kohor, nuk ka rrezik për infektim.
“Mund të themi që të paktën për gjashtë muaj deri në një vit parashikohet, sepse nuk kemi asnjë pacient që ka qenë i sëmurë për gjashtë muaj. Pacienti i parë në Kinë mendohet të ketë qenë në 17 ose 19 nëntor. Por e bazuar në parashikime, duket që nga gjashtë muaj deri në një vit ekzistojnë antikorpet e mjaftueshme për imunitet, mund të jetë edhe imunitet për jetë, këtë nuk e dimë. Por të paktën gjashtë muaj deri në një vit nuk ka rrezik për infektim. Kështu mendohet”.
Sa i takon personave të cilët shërohen, duke iu referuar edhe rastit të Shqipërisë, mjeku Gega tha se është normale që do ekzistojë një gjë e tillë. Vdekshmëria është 1.3-1.5% në një vend ku shëndetësia funksionon normalisht. Duke folur me shifra, ai shtoi më tej se gjasat janë që 98.5% e njerëzve të shërohen.
“Sa i përket festës që duhet të bëjmë për njerëzit, sepse shikojmë edhe në Shqipëri që janë 5-6 pacientë të shëruar dhe dalin në media, politikanë të ekzekutivit dalin dhe e festojnë. Patjetër që ky është një virus që mortalitetin do e ketë 1.3-1.5% në një vend ku shëndetësia funksionon normalisht. Kështu që 98.5% e njerëzve patjetër që do të shërohen. Kështu shpresojmë të vazhdojë, pra ata njerëz që nuk kanë komplikacione serioze, patjetër që do jetojnë dhe do ketë imunitet dhe do dalin nga spitali. Shpresojmë që këto numra të rriten. Pra nëse kemi 100-200 të konfirmuar deri tani në Shqipëri, mendojmë që shumica e tyre do shkojnë në shtëpi të shëruar”.
