Një nga mjekët shqiptarë ne banim në Londër, u ka rikujtuar popullsisë se në shumë raste as bluzat e bardha nuk mund të të shpëtojnë. Ndaj secili prej nesh duhet të tregojë kujdes maksimal, pasi virusi është tejet i rrezikshëm.
Adrian Fandi, në një intervistë për “Ora News”, rrëfen eksperiecën e tij personale, ku e ka kaluar me shumë vështirësi koronavirusin. Ai ishte infektuar në muajin prill, dhe shpresat ishin shuar nëse mund të jetonte ose jo.
“Pika e parë pasi të kesh kaluar Covid-in dhe je me fat të tregosh të tjerëve që ke kaluar covidin, duhet të shkosh në kishë, xhami apo në çdo lloj tempulli që ti beson. Edhe nëse nuk beson e ti thuash: Faleminderit Zotit, sepse është Zoti që të ndihmoi, jo doktori, as infermieri.
Në prill e kalova vetë, dhe nuk e dija nëse mund të jetoja apo jo. Megjithatë sot jam këtu dhe Zoti desh të shërohesha në një periudhë që nuk kishte terapi e ilaçe, dhe çdo gjë ishte eksperimentale”, tha ai.
Mjeku shprehu kritika ndaj atyre që refuzojnë të mbajnë maskë, apo që injorojnë mbajtjen e maskës në takime e grumbullime.
“Ne e kemi mendjen tek tangërlliku, tangërlliku sot janë këto të dyja (Tregon çelësat e makinës dhe telefonin) Ndërsa unë do ju lutesha që nesër e tutje tangërlliku të bëhen këto të dyja, (maska dhe oksimetri)
Nëse ti përdor maskën, tregon tangërllikun tënd. Nëse përdor këtë aparat (oksimetrin) të shpëton jetën. Maska të shpëton jetën, se arrin të evitosh virusin që të hyjë në trupin tënd, ose mund të hyjë në sasi të vogël dhe të të japë shenja sa më të ulëta.
Nuk të duhet telefoni të bësh selfie me ilaçe, të duhet maska të bësh selfie. Je i zoti të jesh në Instagram me maskë dhe oksimetër kjo është moda sot, ndiqeni.
Nëse nuk e përdor maskën kur je në takim, apo në publik, rrezikon veten tënde. Është njësoj si ti thuash; dheut hapu. Ti nuk e di se çfarë fati ke. Nuk je ti ai që vendos. Nuk është doktori ai që do të të shpëtojë, por Zoti. Ti nuk di çfarë imuniteti ke”.
