Katër hajdutë, duke përfituar nga pandemia, kanë arritur që të vjedhin një shumë të majme duke u shtirur sikur ishin mjekë. Të veshur me bluzat e bardha e pa rënë në sy, ata kanë vjedhur rreth 10 mijë euro në një supermarket.
Katër personat në Afrikën e Jugut, të cilët ishin veshur si mjekë, pretenduan se ishin ekspertë shëndetësorë për të inspektuar situatën e COVID-19 në terren. Vjedhja është kryer në një supermarket ushqimesh në provincën KwaZulu-Natal.
Personat në fjalë, pasi kishin hyrë në supermarket, i kanë drejtuar armën arkëtares, duke i kërkuar paratë. Pasi kanë marrë paratë, ata janë larguar nga vendngjarja. I gjithë momenti është fiksuar nga kamerat e sigurisë në supermarket, ndërsa policia raportohet se ka nisur një hetim mbi rastin.
Zëdhënësi i policisë ka thënë se gjithë ngjarja përfundoi pa lëndime. “Katër burra që ishin veshur me rroba të bardha, hynë në një supermarket dhe u drejtuan drejtë arkëtares, dhe i kërkuan paratë. Ajo iu përgjigj të gjitha kërkesave të tyre, dhe fatmirësisht e gjitha mbaroi pa lëndime. Grabitësit kanë marrë një shumë të konsiderueshme parash, por ne jemi vendosur në ndjekje të tyre”, u shpreh zëdhënësi i policisë Mthokozisi.
