Kryeministri Edi Rama ka përcjellë për në Itali 30 mjekë dhe infermierë shqiptarë që do të japin kontributin e tyre për të prekurit nga koronavirusi.
Duke qenë se Italia është një nga shtetet që po zhvillon një luftë të ashpër me COVID-19 dhe ka pësuar humbje të shumta në njerëz, qeveria shqiptare ka vendosur që të ndihmojë shtetin fqinj në kohën që ka më së shumti nevojë.
Kryeministri Rama gjatë fjalës së tij theksoi se shqiptarët dhe Shqipëria nuk e braktisin kurrë mikun në vështirësi.
“Mjekë dhe infermierë shqiptarë që do japin kontributin e tyre në Itali. Janë nga e gjithë Shqipëria. Ne po luftojmë me të njëjtin armik të padukshëm. Ne nuk mund t’i mbajmë forcat rezervë në Shqipëri teksa në Itali po zhvillohet një luftë e madhe.
Është e vërtetë që të gjithë janë mbyllur në kufijtë e tyre, por ne nuk mund t’ja lejojmë vetes një gjë të tillë sepse shqiptarët dhe Shqipëria nuk e braktisin kurrë mikun në vështirësi.
Kjo është një luftë ku askush nuk fiton dot i vetëm.
Sot ne jemi të gjithë italianë dhe Italia duhet ta fitojë luftën edhe për ne dhe gjithë Evropën dhe gjithë botën”, tha Rama.
