Dy ditë më parë u miratua në Kuvend paketa ‘Anti-shpifje’ e cila ka krijuar polemika të shumta, duke çuar edhe në protesta të gazetarëve përpara Parlamentit.
Ndërkohë në lidhje me këtë çështje ka reaguar edhe presidenti Ilir Meta. Në një deklaratë për mediat, Meta deklaroi se do ta shohë me vëmendje këtë ligj si dhe aktet që u miratuan në Kuvend.
“Do ta shoh të gjithë të zbardhur paketën ‘Anti-shpifje’. Do të shohim aktet që u miratuan në Kuvend”, tha ai.
Ngelet për t’u parë tashmë nëse Meta do ta dekretojë apo jo ligjin. Kujtojmë se 82 deputetë dhanë votën pro këtij ligji dhe 13 kundër, ndërsa 5 kanë abstenuar.
