Kryeministri Edi Rama ftoi shtetin e Serbisë që t’i kapërcejë “inatet” e “urrejtjet” e vjetra dhe të njohë pavarësinë e Kosovës. Këtë kërkesë Rama e lëshoi gjatë fjalës së tij në Organizatën e Kombeve të Bashkuara mbrëmjen e djeshme.
Mirëpo, kjo deklaratë nuk nxiti vetëm reagimin e përfaqësuese së Serbisë, e cila u kap nga kamerat duke tundur kokën teksa fliste Rama për Kosovën. Por, gjithashtu u raportua gjerësisht dhe nga mediat serbe. Të cilët, ndryshe nga herët e tjera, nuk e cilësuan thirrjen e Ramës “provokim”.
Media serbe “Sputnik” shkruan në titull: “Rama: Ka ardhur koha që miqtë tanë serbë ta njohin pavarësinë e Kosovës!”
Ndërsa, e nis shkrimin duke cituar kryeministrin shqiptar: “Ka ardhur koha që të gjitha vendet e këtij Kuvendi, veçanërisht miqtë tanë serbë, ta njohin pavarësinë e Kosovës” dhe ta pranojnë, argumenton ai, realitetin si bazën e vetme të besueshme për ndërtimin e një të ardhme më të mirë të përbashkët.”
