Institucionet arsimore vazhdojnë të jenë të mbyllura dhe mësimi po zhvillohet online, ndërkohë që të gjithë presin një përgjigje në lidhje me vijimin e procesit mësimor.
Ministrja e Arsimit Besa Shahini, përmes një videoje të publikuar në rrjetin social Facebook, bëri me dije se qeveria ka gati dy skenarë, por sipas saj, e gjitha varet nga vendimi që do të marrë Task- Forca.
“Ju falenderoj që keni qëndruar në shtëpi. Nuk ka ende një vendim final për mbylljen e vitit shkollor. Do ta kemi në fund të prillit, pra punë ditësh. Thjesht po shohim situatën e koronavirusit dhe po presim një vendim nga Task Forca.
Sidoqoftë i kemi të gjithë skenarët gati, për të dyja rastet. Maturantët na pyesin se kur do t’i publikojmë programet orientuese për ta.
Gjithashtu në fund të prillit. Nuk do përmbajnë temat që nuk janë zhvilluar në kushte shkolle.
Studentët pyesin gjithashtu për mënyrën se si do të mbyllet viti akademik. Ata kanë një fleksibilitet të shtuar duke qenë se provimet i kanë në korrik, por po punojmë shumë ngushtë me dekanët dhe rektorët.
Në fund të ditës vendimin e marrin Universitetet.
Disa maturantë na kanë shkruar edhe se kur do të mbyllet viti dhe nëse do të kenë mundësi për të aplikuar jashtë vendit. Plani ynë është që gjithçka të përfundojë në kohë dhe të mos ketë pengesa për aplikimin jashtë vendit, shumë shpejt merret vendimi.
I kemi gati skenarët dhe mësuesit. Maturantët kanë një pako të veçantë dhe përfshihet edhe një udhëzues se si të punohet me ta. Pjesa e punës tek ta do të jetë e përqendruar tek përsëritja. Na shkruani nëse keni pyetje”, tha Shahini.
