Kryetarja e Komisionit të Jashtëm Parlamentar, Mimi Kodheli, ka folur në lidhje me hapjen e negociatave për Shqipërinë për anëtarësimin në BE.
E ftuar në Report Tv, Kodheli deklaroi se nëse javën tjetër nuk hapen negociatat, humbja do të jetë e BE-së dhe jo e shqiptarëve.
“Humbja do të jetë e atyre dhe jo e shqiptarëve. Shqipërisë do i bëjë vetëm mirë. Le të ndodhë çfarë të ndodhë javën tjetër”, u shpreh ajo.
Sipas saj, themeluesit e Evropës duhet të reflektojnë, pasi janë duke e ekstremizuar qëndrimin.
“Finlanda ka kërkuar pa asnjë kusht hapjen e negociatave. Themeluesit e Europës duhet të reflektojnë, janë duke e ekstremizuar qëndrimin në raport me ata që janë ndryshe nga feja, prejardhja apo gjuha. Po lulëzojnë partitë e ekstremit të djathtë. Të gjitha politikat e viteve të pasluftës u ngritën bazuar në parime dhe vlera që ne duam ti përfaqësojmë. Vijmë te skeptikët tani. Presidenti Macron foli për një Europë ndryshe. Sot Britania e Madhe është jashtë Europës, Merkel është në fund dhe tani është Macron. Ndërsa qeveria holandeze rri në këmbë me një votë plus, imagjino që ai të kalojë në krahun tjetër pasi mund të kundërshtojë negociatat. Holanda e ka për konsum të brendshëm. Di që edhe Macron ka pasur një Europë të një ideje tjetër”, tha Kodheli.
