Ish-ministri i Jashtëm, Paskal Milo, është i mendimit se veprimet ekstreme që po ndërmerr kryetari i PD, Lulzim Basha, bëhen nën urdhrat e ish-kryeministrit Berisha. Për Milon, Berisha ka qenë dhe do të mbetet lideri kryesor në këtë forcë, duke marë çdo vendimmarrje, e ndërsa të tjerët i përdor si mburrojë.
Teksa ka qënë i ftuar në emisionin “I Ftuari” të Endri Xhafos, Milo u shpreh i bindur se Basha është “sponsorizuar” nga Berisha, për të shkuar në këtë rrugë. Ai e konkretizoi opinionin e tij duke thënë se kryedemokrati Basha, nuk e ka stofin e një lideri politik ekstrem që mendon në mënyrë ekstreme, dhe përdor metoda ekstreme në jetën politike.
“Unë nuk besoj se ky është një aksion politik i iniciuar vetëm nga z. Basha. Absolutisht jo. Basha, për mua, nuk e ka stofin e një lideri politik ekstrem, që mendon në mënyrë ekstreme dhe përdor metoda ekstreme në jetën politike.
Z. Basha është sponsorizuar, padyshim, nga z. Berisha për të shkuar në këtë rrugë, pasi ai njihet si lider i fortë që ekstremizon jetën politike shqiptare në funksion të qëllimeve të tija politike. Berisha ka një vullnet të atillë për t’iu futur këtyre veprimeve ekstreme, që Basha nuk e ka”, tha Milo.
Milo deklaroi se Berisha nuk ndalet me punën e tij, vetëm që të drejtojë të tjerët. Për të, Basha është “sponsorizim” i Berishës, dhe çdo dështim i Bashës do të faturohet si dështim i Berishës.
“Berisha është një lider që në 24 orë, ka rrezik që të punojë në 22 orë për mënyrën se si ai të jetë në krye të politikës shqiptare, dhe të diktojë atë sipas shijeve të veta. Ky është formimi i politikanit Berisha dhe jo familjarit Berisha.
Basha është sponsorizim i Berishës, dhe çdo dështim i Bashës do të faturohet si dështim i Berishës. Prandaj, Berisha e nxit Bashën të ecë në këtë rrugë. Duhet patjetër që ta lidhin z. Basha me z. Berisha, për të kuptuar këtë lëvizje të opozitës. Kjo aventurë politike mund ta çojë në situata që uroj për shqiptarët të mos kthehen më”, përfundoi ai.
