Kryeministri i Maqedonisë së Veriut, Zoran Zaev, ka paralajmëruar qytetarët për rritje të çmimeve për shkak të krizës globale. Zaev u shpreh se as Maqedonia e Veriut nuk mund të mos prekej nga kjo krizë energjetike. Ai solli në fokus fjalimin e kryeministrit Rama, i cili më herët tha se kriza energjike do të prekë Shqipërinë, dhe se do të ketë rritje çmimesh.
“Do të kemi krizë. Miku im dhe kolegu im nga Shqipëria, Edi Rama, ngriti shqetësimin në Shqipëri. Tani po paralajmëroj edhe unë. Kriza energjetike do të ndjehet, çmimet janë të larta, por sërish mbetet të presim deri në javët dhe muajt e ardhshëm. Të shohim se si do të shkojë situata, por shteti është këtu për t’ju ndihmuar”, ka thënë Zaev.
Kreu i qeverisë shqiptare, Edi Rama, tha më herët se Shqipëria po preket nga kriza ndërkombëtare e energjisë, e cila parashikohet të diktojë rritjen e çmimeve të elektricitetit dhe karburanteve, deri në gjashtëmujorin e parë të vitit të ardhshëm. Duke e quajtur “fatkeqësi natyrore”, Rama garantoi në një konferencë për shtyp se ngjashëm si me tërmetin e 26 nëntorit 2019 dhe pandeminë, Shqipëria “as nuk rrëzohet, as nuk dorëzohet përballë sfidave të kësaj natyre”.
