Kryeministri Edi Rama u pyet sot për deklaratën e tij në Asamblenë e PS-së për Presidentin Ilir Meta, për të cilin tha “mezi pres ta shoh para drejtësisë”.
Rama kërkoi nga SPAK që të marrë në hetim Ilir Metën, ndërsa përsëriti thirrjen për hetimin e Sali Berishës. Madje kryeministri kritikoi ashpër prokurorët e SPAK-ut, të cilët i kanë sosur durimin me mungesën e vullnetit për hetuar “kokat e mëdha” ose sikurse tha ai “për të përdorur dinamitin mbi peshkaqenët”. E ndërsa sot kreu i qeverisë sqaroi deklaratën për Metën, ndërsa tha se ka kërkuar të hetohen personat që një Shqipëri e tërë kërkon të hetohen, për të mësuar të vërtetën.
Kur e kuptuat që Presidenti Meta duhet të dalë para drejtësisë, kur qeverisnit bashkë apo pasi e votuat për President?
“E kam dëgjuar dhe këtë teori. Unë nuk kam kërkuar të dalë para drejtësisë askush. Kam kërkuar të hetohen personat që një Shqipëri e tërë kërkon të hetohen, për të mësuar të vërtetën.
Pjesa më e madhe mendon dhe që duhet të dënohen e këtë mund ta konstatoni lehtësisht.
Unë nuk e them këtë, nuk është puna ime, s’jam as prokuror as gjykatës. Këto që kam thënë në këto dy-tre dalje, janë për popullin shqiptar ta di ku qëndroj unë. Se erdhi një moment që realisht po e ndieja, e konstatoja nga gjithë komunikimet me njerëzit e adresimet ne rrjetet e mia sociale, që po konturohesha si kolaboracionist.
Unë nuk jam kolaboracionist i askujt e me askënd. Unë jam përfaqësues besnik i atyre shqiptarëve që më kanë dhënë votën. Këto dokrrat e himnit kur thoshte At Gjergj Fishta, nuk janë për këtë konferencë”.
