Kryetari i Kuvendit, z. Ilir Meta, i ka dërguar sot një ftesë zyrtare presidentit të Parlamentit Evropian, z. Antonio Tajani, për vëzhgues ndërkombëtarë të zgjedhjeve, nga ana e Parlamentit Evropian.
Meta në letrën e dërguar presidentit të PE-së thekson rëndësinë e monitorimit të procesit zgjedhor, i cili i shërben cilësisë së tij, por edhe legjitimitetit të rezultatit.
“Besimplotë se monitorimi sa më i gjerë ndërkombëtar dhe vendor i zgjedhjeve të ardhshme parlamentare i shërben cilësisë së procesit por edhe legjitimitetit të rezultatit të tyre, lutem pranoni, i nderuar z. Tajani, ndjenjat e konsideratës sime më të lartë”,- shpreh z. Meta, në letrën e dërguar z. Tajani.
Me poshtë teksti i plotë i letrës:
I nderuar Zoti President,
Më lejoni t’ju informoj se më 18 qershor 2017 do të zhvillohen zgjedhjet për Kuvendin e Republikës së Shqipërisë.
Duke marrë në konsideratë angazhimin e autoriteteve të Republikës së Shqipërisë për të garantuar një proces zgjedhor të rregullt, transparent, demokratik e në përputhje me standardet më të larta bashkëkohore ndërkombëtare, kam kënaqësinë t’Ju përcjell ftesën në emër të Kuvendit të Shqipërisë për një grup vëzhguesish ndërkombëtarë nga Parlamenti Evropian.
Besimplotë se monitorimi sa më i gjerë ndërkombëtar dhe vendor i zgjedhjeve të ardhshme parlamentare i shërben cilësisë së procesit por edhe legjitimitetit të rezultatit të tyre, lutem pranoni, i nderuar Zoti Tajani, ndjenjat e konsideratës sime më të lartë.
