Kreu i Kuvendit në detyrë, Ilir Meta ka njoftuar mbledhjen e nesërme të sesionit të jashtëzakonshëm për të miratuar çështjet që rrjedhin nga marrëveshja Rama-Basha.
Në rendin e ditës së këtij sesioni do të jenë të parashtruara votimi i dekreteve të Presidentit për lirimin dhe emërimin e zëvendëskryeministrit dhe të 6 ministrave; shqyrtimin dhe miratimin e paketës ligjore që ka lidhje me reformën zgjedhore; miratimin e anëtarëve të pakicës parlamentare në 3 komisionet ad-hoc të Vettingut, caktimin e zëvendësuesve dhe zgjedhjen e kryetarit dhe një anëtari të KQZ-së.
Rendi i ditë së seancës plenare të ditës së nesërme:
Bazuar në urdhrin nr. 42, datë 21.5.2017 të Kryetarit të Kuvendit z. Ilir Meta,
rendi i ditës të seancës plenare është si më poshtë vijon:
- Hapja e Sesionit të Jashtëzakonshëm të Legjislaturës së VIII –të të Kuvendit të Shqipërisë.
- Votimi i Dekreteve të Presidentit të Republikës për lirim dhe emërim të:
– Zëvendëskryeministrit
– ministrit të Punëve të Brendshme
– ministrit të Arsimit dhe Sportit
– ministrit të Shëndetësisë
– ministrit të Mirëqenies Sociale dhe Rinisë
– ministrit të Financave
– ministrit të Drejtësisë
(Kushtetuta, neni 98, votim me shumicë absolute)
- Projektvendim “Për një ndryshim të vendimit nr. 12/2017 “Për zgjatjen e afatit të veprimtarisë së Komisionit të Posaçëm të Reformës Zgjedhore” (Rregullorja, nenet 55, 73-77 votim me shumicë të thjeshtë);
- Shqyrtimi dhe miratimi i paketës ligjore propozuar nga Komisioni i Posaçëm i Reformës Zgjedhore;
- Projektvendim “Për caktimin e përfaqësuesve të pakicës parlamentare në komisionet Ad Hoc: (Rregullorja, nenet 55, 73-77 votim me shumicë të thjeshtë);
– “Për verifikimin e kandidatëve në institucionet e rivlerësimit, sipas vendimit nr. 41/2017 të Kuvendit të Shqipërisë me 6 anëtarë”
– “Për përzgjedhjen e kandidatëve në institucionet e rivlerësimit, sipas vendimit nr. 45/2017 të Kuvendit të Shqipërisë me 12 anëtarë”
– “Për përzgjedhjen e kandidatëve në institucionet e rivlerësimit, sipas vendimit nr. 46/2017 të Kuvendit të Shqipërisë me 6 anëtarë”
– “Për caktimin e dy anëtarëve zëvendësues të opozitës në Komisionin Ad Hoc për verifikimin e kandidatëve për Institucionet e Rivlerësimit”
- Projektvendime “Për lirimin nga detyra të një anëtari të KQZ-së” dhe “Për emërimin e një anëtari të KQZ-së” (Rregullorja, nenet 55, 73-77 votim me shumicë të thjeshtë);
- Projektvendime “Për lirimin nga detyra të Kryetarit të KQZ-së” dhe “Për emërimin e Kryetarit të KQZ-së (Rregullorja, nenet 55, 73-77 votim me shumicë të thjeshtë);
