Dje u shënuan plot 11 vite nga protesta e “21 Janarit”, ku mbetën të vrarë katër qytetarë. Kreu i Shtetit, ilir Meta, ka zgjedhur që të “arratisej” dje nga Tirana, për t’u strehuar në qytetin e Korçës dhe për të shmangur ceremoninë e “21 Janarit” që tashmë kujtohet çdo vit nga socialistët. Presidenti nuk pranoi që t’u përgjigjej gazetarëve në lidhje me ngjarjen e “21 Janarit”. 11 vite nga vdekja e 4 protestuesve të pafajshëm, Meta nuk gjeti asnjë fjalë ngushëlluese për familjarët e viktimave, teksa u shpreh se është koha për të dhënë mesazhe për artin dhe kulturën. “Jemi pikërisht në një ditë të tillë, sipas kalendarit dhe jemi për të dhënë mesazhe për artin dhe kulturën”, deklaroi Meta. Kryeministri Edi Rama dhe presidenti Ilir Meta, iu janë rikthyer përplasjeve mes njëri-tjetrit.
Kryeministri Edi Rama komentoi reagimin e Metës. Duke iu përgjigjur pyetjeve të qytetarëve në “Facebook”, kryeministri Rama theksoi se Meta nuk ka se ç’bën tjetër, teksa shtoi se dekoratat e Metës janë “tallje” për ata që shkojnë dhe i marrin. “Si prisni të përgjigjet Ilir Meta për “21 Janarin” dhe çfarë të bëjë përveç se të shpërndajë dekorata? Dekorata pa asnjë vlerë, pa asnjë kuptim, pa asnjë përmbajtje, që janë një tallje e madhe me ata njerëz që për fat të keq shkojnë e i marrin dekoratat e Ilir Metës, sepse janë realisht bosh në përmbajtje, bosh në kuptim, bosh në vlerë”, deklaroi ai.
Pas qendrimit të kryeministri Rama, një kundërpërgjigje ka ardhur nga Presidenca. Zëdhënësi i presidentit Ilir Meta, Tedi Blushi, e cilëson Ramën një piktor të dështuar i cili sipas tij, ka mllef dhe inat me Korçën e vlerave.
Statusi
Ç’po na dëgjojnë veshët!
Korça e arsimit, artit, kulturës dhe qytetarisë pa vlera? Teatri “Andon Zako Çajupi” pa vlera? Artistët e mirënjohur korçarë pa vlera?
Kush ka më shumë vlerë? Zhgarravinat që shiten si piktura? Apo pocaqitë e baltës që shiten si “vepra arti”?
Mllef dhe inat kaq të madh me Korçën e vlerave vetëm një piktor i dështuar anti-vlerë mund të ketë!
Fale o Zot!
