Presidenti i Republikës, Ilir Meta është takuar sot në Prishtinë me kryeministrin e dorëhequr të Kosovës, Ramush Haradinaj.
Përmes një postimi në rrjetin social “Facebook”, Haradinaj ka thënë se në proceset që po kalon Kosova, “angazhimi i përbashkët përballë sfidave e fuqizon faktorin shqiptar”.
“Kënaqësi e veçantë të takoj sonte në Prishtinë Presidentin e Shqipërisë, Ilir Meta, bashkë me vajzën Borën. Rast i mirë për të këmbyer mendime rreth aktualitetit politik në Kosovë, Shqipëri dhe rajon. Në proceset që po kalon Kosova, angazhimi i përbashkët përballë sfidave e fuqizon faktorin shqiptar”, shkruan Haradinaj.
Ndërkohë, Meta vlerësoi karakterin e Haradinajt, duke iu referuar vendimit që mori ky i fundit për t’u dorëhequr nga posti i kryeministrit, e për të cilin tha se është: frymëzues.
“I lumtur të takoja sot Kryeministrin Ramush Haradinaj në Prishtinë. Krenar për karakterin e tij frymëzues!”, tha Meta.
