Presidenti i Republikës, Ilir Meta e ka dënuar me forcë dhunimin e gazetarit Ergys Gjençaj, nga ana e punonjësve të Policisë së Shtetit, teksa ai po filmonte operacionin e efektivëve ndaj një personi që trafikonte lëndë narkotike.
Përmes një reagimi në rrjetet sociale, ku ka publikuar dhe pamjet, Meta shkruan se ky është një rast i përsëritur i cënimit fizik të reporterëve meriton ndëshkim ligjor.
Sipas Metës, përdorimi i pajustifikuar i dhunës, veçanërisht ndaj përfaqësuesve të medias, është kthyer në një mentalitet shqetësues në radhët e Policisë, që duhet trajtuar me zero tolerancë.
”Dënoj me forcë dhunën arbitrare të punonjësve të Policisë së Shtetit ndaj gazetarit të “News 24″, Ergys Gjençaj, i cili ishte në krye të detyrës dhe që gjithmonë ka dëshmuar profesionalizëm të lartë për informimin publik. Ky rast i përsëritur i cënimit fizik të reporterëve meriton ndëshkim ligjor dhe është një tjetër incident i rëndë, që dëshmon se përdorimi i pajustifikuar i dhunës, veçanërisht ndaj përfaqësuesve të medias, është kthyer në një mentalitet shqetësues në radhët e Policisë, që duhet trajtuar me zero tolerancë, në përputhje me ligjin. Duke shprehur solidaritetin dhe mbështetjen e plotë për të gjithë gazetarët kurajozë dhe të pavarur, theksoj se liria e medias është thelbësore për demokracinë dhe integrimin e Shqipërisë në Bashkimin Europian.”, shkruan Meta në rrjetin social, Facebook.
