Kryetari i partisë së Ilir Metës, ka mbërritur te inceneratori i Tiranës, ku i është bashkuar protestuesve. Kështu ka nisur zyrtarisht protesta e thirrur prej tij.
Ambasada e SHBA-së ka apeluar ndaj qytetarëve amerikanë që jetojnë në vendin tonë, të shmangin zonën pranë landfillit të Sharrës, ku do të mbahet protesta e opozitës. Në njoftim thuhet se disa situata mund të ndryshojnë shpejt, dhe në mënyrë të paparashikueshme.
“Qytetarët amerikanë këshillohen të shmangin tubimet e mëdha. Ndërsa shumë ngjarje të mëdha zhvillohen në mënyrë paqësore, disa situata mund të ndryshojnë shpejt dhe në mënyrë të paparashikueshme.
Monitoroni mediet lokale dhe ndiqni udhëzimet e autoriteteve lokale të zbatimit të ligjit për informacionin më të fundit”, thuhet më tej.
Kjo është protesta e parë e kësaj force politike, pasi Meta mori drejtimin e saj. Në vendin ku po zhvillohet protesta, pranë inceneratorit të Tiranës, organizatorët kanë vendosur pankarta ku ilustrohen denoncimet që janë bërë lidhur me aferën e inceneratorëve.
