Presidenti Ilir Meta ka çuar ditën e sotme në Gjykatën Kushtetuese vendimin e Këshillit të Ministrave të datës 8 Maj 2020, për kalimin në pronësi të Bashkisë së Tiranës, të truallit të Teatrit Kombëtar.
“Është një vendim kushtetues i Presidentit që brenda kompetencave të garantojë mbrojtjen e parimeve themelore të saj. Për fat të keq Këshilli i Ministrave në këtë vendim që në pikën 12 të tij, shpreh vullnetin se me kalimin e tij në pronësi të bashkisë, kjo bashki do të vijojë procesin e shembjes dhe ndërtimin e godinave të reja. Përmes këtij akti, shqiptarët kudo ku janë rrezikojnë të humbasin një pasuri me vlerë të lartë të trashëgimisë kombëtare”, deklaroi Meta.
Kreu i Shtetit në vijim theksoi se juridiksioni i bashkisë është i kufizuar dhe se pronësia duhet t’i qëndrojë Republikës së Shqipërisë: “Duke qenë se pasuria që kalon në pronësi të bashkisë, ka emërtimin Teatri Kombëtar dhe është një objekt që lidhet me interesin kombëtar, bashkia Tiranë nuk mund të ketë në pronësi dhe të shprehet për çështje që kalojnë kufijtë e kompetencës dhe juridiksionit. Juridiksioni i bashkisë është i kufizuar, pronësia duhet t’i qëndrojë Republikës së Shqipërisë”.
