Pavarësisht se Kuvendi pritet të votojë sot për shkarkimin e Ilir Metës, presidenti nuk do t’ia dijë, ndërsa vijon me agjendën e tij të planifikuar. Kreu i Shtetit ka preferuar të mos paraqitet në seancën e sotme në Kuvend për të folur para ligjvënësve, por ka pritur në Presidencë Ansamblin Folklorik të Dibrës “Haziz Ndreu”.
Në kuadër të nismës “Artistët në Presidencë” është zhvilluar një aktivitet kulturor, ku Meta nderon me tituj edhe disa nga personalitetet e këtij Ansambli.
Ja se çfarë shkruan Meta
Jam shumë i lumtur, që në këtë ditë kaq të bukur pranvere, të mikpres në Institucionin e Presidentit të Republikës, Ansamblin Folklorik të Dibrës “Haziz Ndreu”, që me aq përkushtim u transmeton brezave, traditat folklorike të një treve të shquar atdhetare.
Dibranët janë shembull frymëzues i pasionit për mbrojtjen dhe promovimin e vlerave kulturore kombëtare. Pas pak, ju ftoj të gjithëve të ndiqni live, këtë aktivitet kulturor, reflektim të shpirtit artistik të jashtëzakonshëm të dibranëve.
View this post on Instagram
Pjesë e aktivitetit ka qenë edhe Bujar Kapexhiu. Ai ka ironizuar seancën plenare të deputetëve për shkarkimin e presidentit Ilir Meta. Kapexhiu ka thënë se në një sallë të mbyllur thuren intriga, ndërsa në ambientin e hapur të Presidencës këndohet dhe hidhen valle.
“Në një sallë të mbyllur thurren intriga, ndërsa në këtë ambient të hapur, në këtë ditë kaq te bukur këndohet dhe hidhen valle. Kur flasim për ata nuk mund të mos qeshim dhe urojmë që ky aktivitet kulturor t’ju shërbejë edhe atyre që të reflektojnë dhe t’i bashkohen festes sonë”.
Kuvendi pritet të votojë sot me shkarkimin e Presidentit të Republikës, Ilir Meta. Seanca përmbyll sot një muaj hetim mes institucioneve, për shkeljet e presidentit gjatë fushatës. Me gjithë shkarkimin nga Kuvendi, vendimi nuk hyn në fuqi pa u shprehur Gjykata Kushtetuese.
