Presidenti i Republikës, Ilir Meta ka pritur ditën e sotme në një takim lamtumire ambasadorin e Malit të Zi në Tiranë, Dušan Mrdović.
Në postimin e tij në Facebook, Meta i shpreh mirënjohjen ambasadorit për forcimin e gjithanshëm të marrëdhënieve mes dy vendeve. Kreu i shtetit shton se bashkëpunimi i ngushtë mes Shqipërisë dhe Malit të Zi, është hap për forcimin e paqes dhe stabilitetit në rajon.
Postimi i plotë:
Kënaqësi e veçantë të falënderoja sot ambasadorin e Malit të Zi, z.Dušan Mrdović në përfundim të detyrës së tij në Shqipëri, për angazhimin e palodhur për forcimin e gjithanshëm të marrëdhënieve të shkëlqyera midis dy vendeve dhe popujve tanë.
Shqipëria vlerëson orientimin euro-atlantik të Malit të Zi, si një partner të rëndësishëm, aleat në NATO dhe në procesin e anëtarësimit në Bashkimin Europian.
Bashkëpunimi i ngushtë mes dy vendeve tona është i rëndësishëm për forcimin e paqes, stabilitetit dhe orientimit euro-atlantik të rajonit.
