Kreu i Shtetit, Ilir Meta, është shprehur i rezervuar lidhur me zhvillimet në Partinë Demokratike, ku ish-lideri i saj Sali Berisha ka nisur aksionin për të shkarkuar Lulzim Bashën. Në një prononcim për mediat nga Pogradeci, Meta zgjodhi të heshte e të mos komentonte çështjet e brendshme të një partie politike. Presidenti u tregua i kujdesshëm në qëndrimin e tij, por tha se palët duhet ti zhvillojnë debatet e tyre në mënyrë demokratike.
“Nuk dëshiroj të komentoj zhvillimet e brendshme në asnjë forcë politike. Duhet ti zhvillojnë debatet e tyre në mënyrë demokratike. Demokracia nuk është e vënë njëherë e përgjithmonë, ka ulje-ngritjet e saj. Shpresojmë të gjithë t’i përmbahen parimeve më bazike të demokracisë”, tha ai.
Meta nuk u prononcua as për akuzat e Berishës se ka një marrëveshje mes Bashës dhe Ramës.
“Nuk dëshiroj të bëhem pjesë e këtyre debateve, do ti keni kohë ti gjykojmë pas 24 korrikut. Janë çështjet e tyre, për mua ka rëndësi të gjithë të respektojnë kushtetutën dhe dinjitetin e çdo qytetari”.
I pyetur se a e ka parë ndonjëherë vendin me një opozitë kaq të dobët, Meta ka përmendur skenarët. Sipas tij, skenari në fjalë luhet prej shumë vitesh dhe ka si qëllim të lërë vendin pa opozitë.
“Jam i bindur se nuk ka përpjekje në botë që të realizojë atë skenar të zi për të lënë Shqipërinë pa opozitë. Një skenar që luhet prej shumë vitesh dhe jam i sigurt që shqiptarët nuk do të pranojnë kurrë të kthehen në modele që nuk janë as në kontinentin tonë, shqiptarët kanë potencial të jashtëzakonshëm për të ecur përpara”, tha Meta.
