Kryetari i Partisë së Lirisë, Ilir Meta, deklaroi gjatë mesditës së sotme në një konferencë për mediat se partia e tij do të vijojë të mbështesë çdo kauzë opozitare sa i takon lëvizjes për protesta. Referuar paralajmërimeve për protesta në shtator, Meta tha se do të bashkëpunojnë me çdo forcë politike, duke iu referuar kështu edhe Sali Berishës e ‘Rithemelimit’.
“Ne do të dalim në përkrahje të çdo iniciative qytetare, të çdo proteste. Një popull që fle në demokraci, zgjohet në diktaturë.
Kjo i ka ndodhur popullit tonë vitet e undit. Ky është zgjim i pandalshëm. Ne bashkëpunojmë me çdo forcë politike, me çdo grup interesi për të vendosur llogaridhënien urgjentisht në këtë vend. Ky është proces i pandalshëm. Historia ka ndryshuar njëherë e përgjithmonë. Këto borxhe ku do i fusë Rama shqiptarët, do i paguajë vetë atij”, tha Meta.
Meta u bëri thirrje punonjësve të administratës të mos firmosin asgjë në shkelje, pasi do të duhet të japin llogari. “I bëj thirrje punonjësve të administratës të mos përdoren si bedela (ai që shkonte në vend të një tjetri në ushtri ose në punë të detyruar kundrejt një pagese). Kemi të bëjmë me aventurierë që në fund fare do thonë fajin e keni ju, se ne me kartelë ishim”, tha Meta.
