Presidenti i Republikës, Ilir Meta, në një deklaratë për mediat, tha që në krye të herës se anulimi i 30 qershorit ishte një vendim i marrë në kushtet e një ngërçi politik, e që palët të reflektonin.
Meta u ndal në lidhje me vendimin e djeshëm të Kolegjit Zgjedhor, duke vënë theksin se ka të bëjë vetëm me partinë ankuese. Po kështu, Presidenti shtoi se Kolegji Zgjedhor nuk shqyrton dekretin e Presidentit dhe se nuk e ka tagrin Kushtetues.
“Vendimi i djeshëm është truk procedurial, për të justifikuar paligjshmërinë e organizatës së PS në KQZ, dhe përpjekje e dëshpëruar për një operacion prapogandistik brenda e jashtë vendimit për të anatemuar vendimin e kreut të shtetit”.
“Dje në Kolegjin Zgjedhor u shqyrtua kërkesa e një partie kundër vendimit të KQZ, që e pengonte një parti të çregjistrohej nga zgjedhjet imagjinare të 30 qershorit. Kolegji e rrëzoi kërkesën për çregjistrimin e saj. Vendimi ka të bëjë vetëm me marrëdhënien e partisë ankuese dhe organizatës socialiste në KQZ që kanë vendosur të zhvillojnë një proces të paligjshëm në 30 qershor”, tha Meta.
Presidenti Meta, ndër të tjera foli për reflektim mes palëve, dhe se nuk do të ndërhyjë për datën 30 qershor.
“Unë mbetet durim plotë pavarësisht se janë shpërdorur më shumë se dy javë, që nga momenti që e hapa këtë dritare për dialog dhe reflektim nga të dy palët. Do të vazhdoj të jem i qetë dhe i duruar, duhet të keni të qartë se Presidenti i Republikës nuk ndërhyn të pengojë zgjedhjet partiake, por padyshim se lidhur me datën 30 qershor, kjo datë ka rënë. Nuk ekziston ligjërisht! Kush dëshiron të bëjë zgjedhje të karakterit partiak, Presidenti nuk ndërhyn”.
